Mal zumene Ihtrag wo mit Hauptgrund gsi isch, warum ich de Blog überhaupt gstartet han: Recommendations. "Winniieeee, ich gah im Summer nach Bali, was chasch so empfehle für so zwei Wuche", Frage ih dem Stil hani ih de letsche Wuche vermehrt becho und han mich nurno wiederholend antwortend druf gfunde - also eh kurzi Zemefassig bzw. Empfehlig:
Bali isch extrem vielfältig und bütet vo Entspannig, Honeymoon, Familie, Strand, Kultur und Party-Ferie eigentlich alles.
Die folgendi Empfehlig, isch für Lüt wo chli vo allem chli öpis wenn'd zum s Big Picture vo Bali erlebe, jedoch bini selber erst zweimal in Bali gseh und han no laaaang nonid gseh was es z'gseh git. Die meiste Ört, wo ich mich ufghalte han, sind eher touristisch defür aber top geignet für "kürzeri" Ferie, wenn'd aber wüki Bali/ Indonesie weg vom Trouble erlebe wosch und dich mit de Kultur befasse wosch, gits sicher besseri Spots.
CANGGU - Party, Beauty, Food & Sport
Mini längsti Zit hani in Canggu, Hotspots vo vorallem de junge. Canggu isch volle mit herzige Cafe's, Beach Clubs und Restaurants. Es bütet gueti Qualität und Abwechslig ah Esse und Drinks (vorallem au westlich beiflussti Kuchi). Es laufet eigentlich täglich Parties und mer findet eifach Lüt zum kennelerne. Tattoo, Nails, Hair und Beautystudios finsch ebefalls ah Vielfalt und zu günstigem Pris (vergliche mit de Schwiz obvi). Au ah Sportahgebot fehlts nöd, Gyms, Pilates, Cycling, Yoga und vieles meh und natürlich en perfekte Ort zum lerne Surfe. Overall isch Canggu eher chli türer als die restliche Ört, da's halt wüki chli de Mainspsot isch. Es lit am Strand, wobi de Strand leider nöd de schönst isch. Halb so schlimm für das bütet sich anderei Ört perfekt.
ULUWATU - Beach, Food & Beachclubs
Die schönste Stränd, helle Sand, gueti Welle und top Esse - eine vo mine Favs: Uluwatu. Uluwatu lit im Süde vo Bali und ghört ebefalls zu de schneller entwickelnde Ört. Bizli meh "High End" als Canggu und klar chli ruhiger bütet Uluwatu im Gegesatz zu Canggu wüki traumhafti Stränd. Au da hets eh grossi Uswahl ah guete Restaurants, Spa's, Sportaktivitäte und Clubs - eine devo ghört zu mine fav Beachclubs in Bali: Savaya und isch ufjedefall en Bsuech wert.
UBUD - Yoga, Reisfelder und Tempel
Zum chli abecho und sich entspanne isch Ubud de perfekti Ort. Chli im südliche innere umgebe vo de berüehmte Risfelder und wunderschöne Wasserfäll isch Ubud de Place für all Yoginis und Lüt wo eh gueti Meditation Session schätzet. Au da gits viel z'entdecke wie Kaffeplantage, Tempel und ebefalls feine Restis & Cafe's - chli günstiger, als Canggu und Ulu.
SEMINYAK, KUTA UND CO - Canggu from Alieexpress
Was oft nebe Canggu oder als Alternative empfohle wird isch Seminyak oder Kuta. Persönlich würi aber nöd unbedingt empfehle det für paar Teg bliebe wills eifach Canggu inere nonid so wit entwickelter Variante isch (und evt. Biz ruhiger). Wenn'd trotzdem mal öpis det wosch entdecke hesch knappi 20 Minute mit Grab (kostet dich öpe 0.30.- CHF) und isch entsprechend eifach erreichbar.
THE ISLAND (Indonesien: Bali, Lombok)
Was ebefalls sicher lohnenswert isch, wenn sich gnueg Zit bütet, isch en Abstecher uf eh Insle nebedrah. Au da gits verschiedeni Variante mit verschiedene Möglichkeite. Was ebefalls no wichtig isch zum erwähne, dass es uf de Insle kei Grab git - d.H. entweder selber en Töff oder es Velo miete oder denn en Fahrer bueche.
NUSA PENIDA - Instaspots from Bali
Penida isch DE Ort wo glaubs ih jedere Insta oder Pinterest suechi finsch wenn Bali ihgisch. Diamond und Kelingking Beach wüki UNREAL aber je nach Saison leider sehr sehr Touri überlofe. Obwohl mer muen sege, dass viel eifach anelaufet , es Foti machet und witergönd - de Strand bliebt relativ leer. Wunderschöni Umgebig und en super Place zum bsp. eh Schnorcheltour bueche.
Kurze Disclaimer:
Ah die Ört wo jetzt chömed hanis selber leider nonid gschafft und rede nur vo Erfahrigsbricht vo Kollege/ Kolleginne, has trotzdem welle drihneh wills sicher sehenswert isch und au uf minere eigete Bucketlist staht.
NUSA LEMBONGAN - Nusa Penida höher entwickelt
Oft stellt sich d Frag öb Nusa Penida oder Nusa Lembongan. Nusa Penida isch eher chli meh zum Entdecke und abentürricher und Nusa Lembongan bütet defür eh besseri und grösseri Uswahl ah Resti's, Shops und Co. ah.
Au da sötts wunderschöni Stränd ha zum chöne gnüsse.
GILI T - Beach, Schnorcheln und Party
Party, Dr0gs and Alcohol - aber natürlich gönd die meiste für d Stränd und s Meer ;). Da in Indonesie sehr strengi Gsetz für Drogekonsum git, flüchtet vieli für es Weekend nach Gili T, wo's kei Polizei het. Unvergesslichi Partys und ufjedefall crazy Erlebniss und Begegnige erwartet dich da und trotzdem genau glich krassi Stränd und Bademöglichkeite.
GILI AIR - Gili T but in Calm
Wenn'd jetzt eher d Vorteil vo de Natur in Gili gnüsse wosch und weniger go fire, bütet sich als Alternative Gili Air. Genau so schön aber einiges ruhiger hesch in Gili Air de perfekti Ort gfunde. Schnorchel oder Tauchgäng empfehlet sich au da und d Wahrschinlichkeit isch gross, dass eh Meeresschildkrot und anderi herzigi Tier sichtisch.
Mini Empfehlig, wenn'd jetzt also ca. 14 Täg hesch, und vo allem bizli öpis gseh wosch wer folgendi Route:
Tag 1-3: Ubud zum chli Abecho, Jetlag usschlafe und die erste Impressione vo Bali becho
Tag 3-5: Eh Insle, je nach Vorliebe
Tag 6-9: Canggu, für Party, Action und Connecte
Tag 10-14: Uluwatu zum de Strand gnüsse, guet Esse und evt. au da nomal guet go Fire
Wenn'd susch no Frage hesch oder sache wo dich Wunder nehmet, defsch mer gern Schriebe oder uf die nächste Blog Ihträg freue.
XX Winnie